Rusiyalı virusoloq-mütəxəssis Anatoli Altşteyn Ebola və hantavirusun təhlükə səviyyəsini müqayisə edib.
O bildirib ki, Ebola virusu yoluxma riskinə görə hantavirusdan qat-qat təhlükəlidir.
Altşteyn qeyd edib ki, Ebolanın simptomları hantavirusun əlamətlərindən əhəmiyyətli dərəcədə fərqlənir: "Ebola daha təhlükəlidir və xəstəlik zamanı ölüm göstəricisi olduqca yüksəkdir. Hantavirus isə insanlar arasında çox zəif yayılır".
Mütəxəssis "MV Hondius" kruiz gəmisində aşkarlanan hantavirus növünün də yüksək ölüm riski daşıdığını vurğulayıb: "Ölüm ehtimalı baxımından bu iki virusu müqayisə etmək olar. Lakin gəmidə aşkarlanan hantavirus növünün daxili qanaxmaya səbəb olma ehtimalı daha azdır. O, əvəzində daha çox ürək və ağciyər zədələnmələrinə yol açır".
Xatırladaq ki, mayın 17-də ÜST Konqo Demokratik Respublikası və Uqandada Ebola epidemiyasını beynəlxalq fövqəladə vəziyyət elan edib. Təhlükəli xəstəliyin artıq ölkə hüdudlarından kənara yayılması rəsmən təsdiqlənib.
