Nepal hökuməti Everestin zibildən təmizlənməsi və buzlaqların əriməsinin monitorinqi üçün humanoid robot istifadəsinə imkan verəcək qanun layihəsi hazırlayır.
“The Kathmandu Post”un məlumatına görə, PEMBA layihəsinin təşəbbüskarları ABŞ-nin “Geologic Dome” təşkilatı və Nepalın “Fourteen Peaks Expedition” şirkətidir.
Plan 2025-ci ilin yaz alpinizm mövsümündə robotu Everestə göndərməkdir. Çinin “Unitree Robotics” şirkətinin istehsalı olan “Unitree G1” humanoid robotu seçilib.
Sınaq ekspedisiyası 52 gün davam edəcək. Məqsəd robotun zibil toplamaq, buzlaqları izləmək və təhlükəli dağ əməliyyatlarında kömək etmək qabiliyyətini yoxlamaqdır.
Təxminən 1.3 metr boyu və 35 kq çəkisi olan robot 3D-lidar və kameralarla təchiz olunub. Beş və üç barmaqlı əlləri hər biri 3 kq-a qədər yük daşıya bilir. Batareya təxminən 2 saat işləyir.
Fevralda “Unitree G1” Çinin Sincan-Uyğur bölgəsində -47.4°C temperaturda 136 min addım ataraq sınaqdan keçib.
