Everest dağında bələdçi işləyən şəxs su, qida və oksigen ehtiyatı olmadan altı gün keçirdikdən sonra sağ tapılıb. Bu barədə "The Himalayan Times" məlumat yayıb.
Mayın 29-da 52 yaşlı Dava Şerpa polşalı alpinisti eniş zamanı müşayiət edib. Alpinist donvurma xəsarəti aldığı üçün zirvəyə yürüş yarımçıq qalıb. Naməlum səbəbdən bələdçi "Sarı zolaq" yaxınlığında tək qalıb. Alpinistlər düşərgəyə çatsa da, Şerpa ora çata bilməyib.
Bələdçinin çalışdığı "Himalayan Traverse" şirkəti xilasetmə dəstəsi göndərməyib. İyunun 3-də başqa firma helikopter axtarışı etsə də, nəticə verməyib.
Şerpa təkbaşına enişə başlayıb. İyunun 4-də təmizlik işləri aparan komanda onu aşkar edib: yerlə sürünən bələdçiyə dərhal kömək göstərilib.
Helikopter taqətdən düşmüş və donvurma xəsarətləri almış şəxsi Katmandu xəstəxanasına çatdırıb. O, çətinliklə danışa bilib. Təxminən 3 km məsafəni qət etdiyi güman edilir.
