NASA Yer kürəsində gecə işıqlanmasının dəyişməsini göstərən fotolar yayımlayıb. Xəritələrdə Böyük Britaniyanın geniş ərazilərinin qaranlığa büründüyü aydın görünür.
"Daily Mail" nəşrinin məlumatına görə, Birləşmiş Krallıqda gecələr əvvəlki dövrlə müqayisədə 22% daha qaranlıq olub. Bu Böyük Britaniyanı Avropada ikinci yerə qoyur. Birinci yerdə gecələrin 33% daha az işıqlı olduğu Fransa qərarlaşıb.
NASA mütəxəssisləri bu tendensiyanı enerjiyə qənaət edən LED lampalara keçid kimi texnoloji yeniliklərlə əlaqələndirir. Həmçinin COVID-19 pandemiyası və Rusiya-Ukrayna müharibəsi sonrası enerji böhranı da qısamüddətli azalmalara səbəb olub.
NASA-nın doqquzillik araşdırması yüksəkhəssas sensorlarla aparılıb. Məlumatlar göstərir ki, bəzi bölgələrdə işıqlanma artsa da, digərlərində azalıb. Qlobal miqyasda süni işıqlanma 16% artıb.
Çin və Hindistanda gecə işıqları daha parlaqlaşıb. Saharadan cənubda yerləşən Afrika ölkələrində də artım müşahidə olunur. Avropada isə qaralma tendensiyası var: 2022-ci ilə qədər gecələr 4% daha qaranlıq olub. Niderlandda bu göstərici 21% azalıb. Venesuelada isə iqtisadi tənəzzül səbəbindən işıqlanma 26% azalıb.
