"Miss New York Elite" titulu sahibi Keytlin Rouz Kennedi-Melanson dəbdəbəli toyunun hesabını tam ödəmədiyi üçün məhkəməyə verilib.
Ny York Post nəşrinin məlumatına görə, toy Nyu-Yorkun Beşinci prospektindəki lüks hoteldə keçirilib. Tədbirdə qonaqlara penthaus, şəhər mənzərəli dam terasında şam yeməyi və premium xidmətlər təqdim olunub. Yalnız iaşə xidməti 100 min dollar olub.
Kennedi-Melanson toy görüntülərini sosial şəbəkədə paylaşıb. O, nikah mərasimini Müqəddəs Patrik Katedralında keçirib.
Hotel rəhbərliyi iddia edir ki, gəlin 106 min dollar ödəsə də, qalan 37 min dolları hələ də ödəməyib. Faizlərlə borc 40 min dolları keçir.
Keytlin isə hotelin iddialarını "cəfəngiyyat" adlandırıb. O, vəkili ilə məsləhətləşmədən açıqlama verə bilməyəcəyini bildirib. Həmçinin qeyd edib ki, iddia ərizəsi onlara təqdim edilməyib, çünki məhkəmə sənədlərindəki ünvanda artıq yaşamırlar.
Kennedi-Melanson 2025-ci ildə broker şirkətinin təsisçisi Qreq Melansonla ailə qurub.
