Pankisi dərəsində "İslam Dövləti" (İŞİD) terror qruplaşmasının üzvü olmaqda şübhəli bilinən üç Gürcüstan vətəndaşı saxlanılıb.
Oxu.Az "Interpress"ə istinadən xəbər verir ki, bu barədə Gürcüstan Dövlət Təhlükəsizliyi Xidmətinin rəhbərinin birinci müavini Laşa Maqradze məlumat verib.
Bildirilib ki, Gürcüstan vətəndaşları mayın 19-na keçən gecə Pankisi dərəsinin Omalo, Birkiani və Cokolo kəndlərində keçirilən əməliyyat zamanı saxlanılıblar.
Araşdırma zamanı müəyyən edilib ki, saxlanılan şəxslər İŞİD sıralarına qoşulub və terror fəaliyyəti həyata keçirmək məqsədilə xarici kuratorlardan təlimatlar alıblar. Onların Pankisi dərəsində terror təşkilatını dəstəkləyən qrup yaratmağa və digər şəxsləri həmin fəaliyyətə cəlb etməyə çalışdıqları bildirilir.
Məlumata görə, onlar bu məqsədlə gizli görüşlər keçirib, həmçinin İŞİD ideologiyasının təbliği ilə məşğul olublar.
Saxlanılarkən şübhəli şəxslərdən odlu silah, sursat, partlayıcı maddələr, kompüter avadanlıqları və mobil telefonlar götürülüb. Əməliyyat zamanı hüquq-mühafizə orqanlarının əməkdaşları "İslam Dövləti" bayrağını və simvollarını da aşkar ediblər.
Onlara qarşı xarici terror təşkilatında iştirak (328-ci maddə) və qanunsuz silah dövriyyəsi (236-cı maddə) üzrə istintaq aparılır. Saxlanılanları 17 ilədək həbs gözləyir.
