Haitidə silahlı qruplaşmalar arasında şiddətli toqquşmalar davam edir. Son üç gündə təxminən 5300 nəfər evlərini tərk etmək məcburiyyətində qalıb.
Oxu.Az xəbər verir ki, bu barədə "Le Monde" nəşri məlumat yayıb. Silahlı insidentlər paytaxt Port-o-Prensin şimal ərazilərində tüğyan edir.
Hüquq müdafiəçisi Pyer Fritsnel bildirib ki, cinayətkar qruplar yaşayış binalarını, məktəbləri və ticarət obyektlərini qarət edib yandırırlar. Qruplaşmalar arasındakı amansız müharibə "Sərhədsiz Həkimlər" təşkilatının xəstəxanalarını bağlamağa məcbur edib.
Haitidə vətəndaş müharibəsi 2021-ci ildən bəri davam edir. Cinayətkar dəstələr paytaxtın böyük hissəsini və bir neçə mərkəzi bölgəni nəzarətə götürüblər. BMT-yə görə, 2025-ci ilin martından 2026-cı ilin yanvarına qədər 5500-dən çox insan həyatını itirib, 2600 nəfər yaralanıb. 2021-ci ildən bəri ümumi ölüm sayı 20 minə yaxındır.
