Göyərtəsində hantavirus yayılan "MV Hondius" sərnişin gəmisi Rotterdam limanına yan alıb.
Oxu.Az xəbər verir ki, bu barədə "nu.nl" nəşri məlumat yayıb.
Nəşrin məlumatına əsasən, gəmi yerli vaxtla saat 10:30-da 7 nömrəli estakadada lövbər atıb. Gəmi heyəti tibb işçilərinin nəzarəti altında quruya ayaq basıb. Onlar gəmidə qalan sərnişinlərlə birgə liman ərazisindəki xüsusi yaşayış modullarında karantin rejiminə cəlb ediləcəklər.
Hüquq-mühafizə və xüsusi xidmət orqanları gəminin dayandığı ərazini və bütün giriş yollarını bağlayıb. Sərnişinlərin və heyətin yerləşdirildiyi modullar tam nəzarətə götürülüb. Dezinfeksiya üçün bəzi heyət üzvləri gəmidə saxlanılıb.
Gəminin təmizlənməsinə sabahdan başlanacaq və cümə gününədək yekunlaşacaq. Prosesi xüsusi təmizlik şirkəti icra edəcək.
"MV Hondius" aprelin əvvəlində Argentinanın Uşuaya limanından yola çıxıb. Gəmidə 23 müxtəlif ölkədən təqribən 150 nəfər olub. Səyahət zamanı bir neçə şəxsdə kəskin tənəffüs yolları xəstəliklərinin əlamətləri özünü göstərib.
Ümumdünya Səhiyyə Təşkilatı (ÜST) mayın əvvəlində gəmidə "Andes" ştammı mənşəli hantavirus infeksiyasının yayıldığını elan edib. Mayın 10-da gəmi Tenerife adası sahillərinə yan alıb. Orada sərnişinlər və heyətin bir hissəsi təxliyə edilərək karantinə götürülüb.
ÜST-nin məlumatlarına görə, 9 nəfərin hantavirusa yoluxduğu ehtimal edilib. Onlardan yeddisinin diaqnozu təsdiqlənib, üç xəstə isə həyatını itirib. ÜST-nin baş direktoru Tedros Adhanom Qebreyesus genişmiqyaslı epidemiya riskinin olmadığını, amma vəziyyətin dəyişə biləcəyini bildirib.
