İsrail ordusu Qəzza zolağının şimalında terrorçuların yeraltı şəbəkəsini məhv edib. Xüsusi əməliyyat zamanı 14 kilometrlik tunellər dağıdılıb, 70-dən çox HƏMAS üzvü öldürülüb.
İsrail Müdafiə Qüvvələrinin məlumatına görə, 252-ci Diviziyanın rəhbərliyi altında Şimal Briqadası və “Yahalom” xüsusi təyinatlı bölməsi birgə əməliyyat keçirib. Əsas hədəf Beyt-Xanun rayonunda, “Sarı xətt”dən şərqdə yerləşən HƏMAS-ın yeraltı infrastrukturu olub.
Tunellərdə çoxsaylı yaşayış otaqları və böyük silah anbarı aşkar edilib. HƏMAS-ın bu tunellərdən hücumlar üçün istifadə etdiyi bildirilir.
İsrail mənbələri əməliyyatın davam etdiyini və terror şəbəkəsinin tam məhv ediləcəyini vurğulayır. Bu, son ayların ən genişmiqyaslı yeraltı təmizləmə əməliyyatlarından biridir.
