İyunun 26-da ABŞ-ın vasitəçiliyi ilə İsrail və Livan arasında imzalanmış çərçivə sazişi iki ölkə arasında sülhün təməlini qoya bilər.
Bunu İsrail Prezidenti İsxak Hersoq Rumıniyada səfərdə olarkən bildirib. Hersoq bütün qonşularla sülh şəraitində yaşamaq istədiklərini vurğulayıb.
Avropa İttifaqı və beynəlxalq ictimaiyyətin bu razılaşmaları dəstəkləməli olduğunu deyən prezident, Livanın iqtisadiyyatının bərpası və İsrailin təhlükəsizliyinin təmin edilməsinin vacibliyini qeyd edib.
Hersoq həmçinin Suriya ilə dinc münasibətlər qurmağa çalışdıqlarını və Qəzza zolağında münaqişənin sülh yolu ilə həllində maraqlı olduqlarını bildirib.
Sazişə əsasən, İsrail hərbçiləri Litani çayı ətrafındakı iki zonanı Livan ordusuna verəcək. Mərhələli şəkildə Livan silahlı qüvvələri bütün ərazi üzərində nəzarəti bərpa edəcək. Qeyri-hökumət silahlı qruplaşmaları tərksilah ediləcək.
