İsrail müdafiə naziri İsrael Kats, ordunun Livandan çıxarılması üçün şərtləri açıqlayıb. O bildirib ki, "Hizbullah" təşkilatı tərk-silah edilənədək İsrail qoşunları Livanda qalacaq.
Oxu.Az-a istinadən xəbər verilir ki, Kats İsraillə Livan arasında əldə olunan çərçivə sazişini şərh edərkən bu açıqlamanı verib. Onun sözlərinə görə, bu razılaşma təhlükəsizlik sahəsində tarixi hadisədir.
"Razılaşmada əsas prinsip budur ki, Livanın bütün ərazisində "Hizbullah" tərk-silah edilənədək və İsrailin şimalındakı sakinlərin təhlükəsizliyi təmin olunana qədər İsrail qüvvələri Livandan çıxarılmayacaq", - deyə nazir vurğulayıb.
Kats həmçinin bildirib ki, İsrail Livandan qoşunlarını çıxarmayıb və Bofor silsiləsi də daxil olmaqla, təhlükəsizlik zonasını saxlayır. SAXAL (İsrail ordusu) şimalda əsgərlərə və yaşayış məntəqələrinə hücumların qarşısını almaq üçün fəaliyyət azadlığını qoruyur.
Nazirin fikrincə, bu razılaşma İran üçün "strateji zərbədir". O əlavə edib ki, Livanın gələcəyi artıq İran və "Hizbullah" tərəfindən müəyyən edilməyəcək və İran razılaşmanın icrasına mane olmaq üçün İsrailə hücum edərsə, İsrail "böyük güclə" cavab verəcək.
