İsveç hökuməti miqrantların ailə üzvləri üçün yaşayış icazəsi şərtlərini sərtləşdirir. Yeni qanun layihəsi ilə gəlir tələbləri artırılır və iki il gözləmə müddəti tətbiq edilir.
Miqrasiya naziri Yohan Forssell bildirib ki, məqsəd miqrantların maliyyə müstəqilliyini və inteqrasiyasını təmin etməkdir. Yeni qaydalara əsasən, həyat yoldaşı və iki uşağı gətirmək üçün aylıq gəlir 23 818 kron (təxminən 2563 dollar) olmalıdır.
Dövlət yardımları və işsizlik müavinətləri gəlir kimi sayılmayacaq. Həmçinin, müraciət edənin bütün ailəni yerləşdirəcək uyğun mənzili olmalıdır.
İki illik gözləmə müddəti əmək miqrantları, tədqiqatçılar, doktorantlar və bəzi qaçqın kateqoriyalarına şamil olunmur. Dəyişikliklər oktyabrın 1-dən qüvvəyə minəcək.
