İsveç hökuməti Rusiyaya doğru hərəkət edən "Sea Owl I" tankerinin gürcüstanlı kapitanını saxlayıb.
Oxu.Az xəbər verir ki, bu barədə "RİA Novosti" məlumat yayıb. Əvvəllər İsveç sahil mühafizəsi eyni gəmidən başqa bir dənizçini də saxlamışdı.
Məlumata görə, İsveç sahil mühafizəsi martın 12-də tankerin saxta bayraq altında İsveç ərazi sularında hərəkət etdiyinə dair şübhələr əsasında gəmiyə baxış keçirib.
2007-ci ildə inşa edilən, 228 metr uzunluğundakı "Sea Owl I" son illərdə Rusiya ilə Braziliya arasında neft məhsullarının daşınmasında istifadə olunub. Tanker Braziliyanın Santos limanından yüksüz Primorska gedirmiş.
Avropa İttifaqının sanksiyalar tətbiq etdiyi tanker Kamerun bayrağı altında üzür, lakin Kamerun İsveçin sorğusuna cavab olaraq gəminin ona məxsus olduğunu təsdiqləməyib.
Bundan əvvəl Rusiya vətəndaşı olan kapitan saxlanılmış, lakin sonradan sərbəst buraxılmışdı.
