Böyük Britaniyanın "Jaguar Land Rover" şirkəti ABŞ-də 250.857 yolsuzluq avtomobilini geri çağırır. Səbəb sürücünün təhlükəsizlik yastığındakı nasazlıqdır.
Oxu.Az xəbər verir ki, bu barədə "Reuters" agentliyi ABŞ Milli Avtomobil Yolları Hərəkətinin Təhlükəsizliyi İdarəsinə istinadən məlumat yayıb.
Geri çağırma "Land Rover"in "Defender", "Discovery" modellərinə və "Range Rover" seriyasından bəzi avtomobillərə aiddir. Bu modellər Hindistanın "Tata Motors" korporasiyasına məxsusdur.
Problem sürücünün təhlükəsizlik yastığındakı yay birləşdiricisinin korroziyaya uğramasıdır. Bu nasazlıq sistemin düzgün işləməsinə mane ola bilər və qəza zamanı xəsarət riskini artırır.
Dilerlər konnektor klemalarına pulsuz qoruyucu sürtkü geli tətbiq edəcəklər. İstehsal illəri barədə məlumat verilməyib.
