Birləşmiş Ştatların silah bazarında "Kalaşnikov" avtomatının mülki modellərinin sürətlə azalması müşahidə olunur. Bu silahlar artıq sıravi istifadə vasitəsindən lüks tələbat malları sırasına keçir.
Oxu.Az xəbər verir ki, bu barədə "The New York Times" nəşri məlumat yayıb.
Birləşmiş Ştatlarda AK dövriyyəsinin əsas dəstəkçilərindən sayılan silah mütəxəssisi Cim Fuller nəşrə müsahibəsində mövcud vəziyyəti "Qəflətən hər şey qeyb oldu" ifadəsi ilə xarakterizə edib.
Bildirilir ki, yaranmış vəziyyətə bir neçə faktor təsir göstərir. Sanksiyalar, gömrük rüsumları, sursatın qiymətindəki kəskin artım və rəqib AR-15 modellərinin getdikcə populyarlaşması əsas səbəblər arasındadır.
ABŞ vətəndaşlarını ən çox narahat edən məqam qiymət artımıdır. 80-ci illərdə bir neçə yüz dollara AK əldə etmək mümkün idisə, hazırda onun dəyəri beş dəfə yüksəlib. Nəticədə bu silah kolleksiyaçıların hədəfinə çevrilib.
Xarici istehsalçılar da yüksək rüsumların ağırlığını hiss edirlər. Polşanın WBP müəssisəsinin rəhbəri Yaçek Popinski bildirir ki, indiki şəraitdə Amerika şirkətləri ilə rəqabət aparmaq çox çətindir.
