Cənubi Kaliforniyanın Qarden Qrov şəhərində təhlükəli kimyəvi maddə sızması səbəbindən boşaldılan evlər qarətçilərin hədəfinə çevrilib.
"New York Post" nəşrinin məlumatına görə, 50 mindən çox sakin kimyəvi fəlakət riskinə görə evlərini tərk edib. Polis yeddi nəfəri həbs edib.
Hadisə mayın 21-də "GKN Aerospace" zavodunda baş verib. Rezervuardakı metilmetakrilatın həddindən artıq isinməsi nəticəsində təzyiq artıb, zəhərli buxarlar yaranıb.
Mayın 24-də qubernator Qevin Nyusom Orinc dairəsində fövqəladə hal elan edib. Yanğınsöndürmə rəisi Kreyq Kovi bunu Kaliforniya tarixində ən ağır kimyəvi insident adlandırıb. Hazırda təhlükə sovuşub, çat sayəsində temperatur düşüb, partlayış riski aradan qalxıb.
