Yay aylarında kondisionerdən düzgün istifadə edilməməsi burun axıntısı, boğaz ağrısı, baş ağrısı və əzələ spazmlarına yol aça bilər.
Rusiyalı həkim-terapevt İvan Eryomenko RuNews24.ru nəşrinə bildirib ki, ən çox rast gəlinən səhv otağın həddindən artıq soyudulmasıdır. O, daxili və xarici temperatur arasındakı fərqin 5-7 dərəcəni keçməməsini, otaq temperaturunun isə 22°C-dən aşağı olmamasını tövsiyə edib.
Həkim qeyd edib ki, qəfil temperatur dəyişikliyi ürək-damar və tənəffüs sistemlərinə yükü artırır, baş ağrılarına və xroniki xəstəliklərin kəskinləşməsinə səbəb olur.
Soyuq hava axınının birbaşa üzə, boyuna, sinəyə, qollara və ya ayaqlara yönəldilməməsi tövsiyə olunur. Əks halda selikli qişalar qıcıqlanır və əzələlərdə spazm yaranır. Havanın otaqda bərabər paylanması və ya yuxarıya yönəldilməsi daha yaxşıdır.
Kondisioner havanın rütubətini 20-30%-ə qədər azalda bilər. Rahat rütubət səviyyəsini (40-60%) saxlamaq üçün nəmləndirici və ya açıq su qablarından istifadə edilməli, otaq mütəmadi havalandırılmalıdır.
