Konqo Demokratik Respublikasında silahlı bir qrup gənc Ebola xəstəxanasına basqın edib. Onlar ölən qohumlarının cəsədlərini tələb ediblər.
Oxu.Az xəbər verir ki, bu barədə məlumatı "Associated Press" agentliyi xəstəxananın baş həkiminə istinadən yayıb.
Hadisə mayın 24-ü axşam saatlarında Monqbvalu şəhərində qeydə alınıb. Məlumata görə, tibb işçiləri xəstələri təcili olaraq təxliyə etmək məcburiyyətində qalıblar.
Baş həkim Riçard Lokudunun sözlərinə görə, silahlı basqınçılar qohumları olan iki nəfərin nəşinin geri verilməsini istəyiblər. İnsident zamanı xəsarət alanlar barədə məlumat verilmir.
Xatırladaq ki, mayın 22-də Konqonun Rvampara şəhərində naməlum şəxslər Ebola virusuna yoluxanların müalicə edildiyi tibb mərkəzini yandırıblar. Həmin hadisə yerli gənclərə ölən dostlarının cəsədinin verilməsindən imtina edildikdən sonra baş vermişdi.
