Kuba rəhbərliyi ABŞ tərəfindən təklif edilən 100 milyon dollarlıq humanitar yardımı nəzərdən keçirməyə hazır olduğunu bildirib.
Xarici işlər naziri Bruno Rodriges Parrilya "X" sosial şəbəkəsindəki paylaşımında Kuba hökumətinin təmiz niyyətlə edilən xarici yardımları rədd etmək təcrübəsinin olmadığını vurğulayıb.
O, təklifin təfərrüatlarını dinləməyə və mexanizmlə tanış olmağa hazır olduqlarını bildirib. Katolik kilsəsi ilə birgə fəaliyyətin uzunmüddətli və müsbət təcrübəsinə də diqqət çəkib.
Nazir əlavə edib ki, Vaşinqton vəsaitin forma (maliyyə və ya material) və məqsədini hələ dəqiqləşdirməyib.
Parrilya ABŞ-ın ən böyük yaxşılığının iqtisadi blokadanı sona çatdırmaq olduğunu qeyd edib. Mayın 13-də ABŞ dövlət katibi Marko Rubio yardım təklifini açıqlayıb.
