Litvanın Dövlət Sərhəd Mühafizə Xidməti Belarusdan yeraltı tunel vasitəsilə ölkəyə daxil olmağa çalışan 38 miqrantı saxlayıb.
Oxu.Az xəbər verir ki, bu barədə məlumatı LRT yayıb. Özlərini Əfqanıstan və İran vətəndaşları kimi təqdim edən 36 kişi və iki qadın Şalçininkay rayonunda tuneldən çıxaraq sərhədi keçməyə cəhd ediblər.
Sərhədçilər qaranlıqda meşəlik ərazidə onları təqib edərək yaxalayıblar. Miqrantların bəzilərinin üzərində şəxsiyyəti təsdiq edən sənədlər olub. Saxlanıldıqdan sonra onlara ərzaq və ilk ehtiyac əşyalarından ibarət humanitar yardım paketləri təklif edilsə də, əksəriyyəti bu yardımdan imtina edib.
Litva tərəfi qeyd edir ki, yeraltı tunellərdən istifadə cəhdləri daha əvvəl - aprel və may aylarında Vilnüs rayonunda da qeydə alınıb. Onların ehtimalına görə, bu tunellər Belarus sərhədçilərinin məlumatı daxilində hazırlanır.
İlin əvvəlindən bəri Belarusdan Litvaya yüzlərlə miqrant qanunsuz yolla keçməyə çalışıb. 2021-ci ildən bəri isə 25 mindən çox qeyri-qanuni keçid cəhdinin qarşısı alınıb.
