Fransa Prezidenti Emmanuel Makronun iqamətgahı olan Parisdəki Yelisey sarayında axtarış aparılıb. Bu barədə "Le Monde" nəşri məlumat yayıb.
Araşdırma, görkəmli şəxsiyyətlərin qalıqlarının Panteona köçürülməsi mərasimi üçün 20 ildən çox müddət ərzində tək bir şirkətə dövlət müqavilələrinin verilməsi faktı ilə bağlıdır.
Mayın 21-də Parisin maliyyə işləri üzrə iki istintaq hakimi Panteona giriş mərasimlərinin təşkili ilə bağlı araşdırma çərçivəsində Yelisey sarayında axtarış həyata keçirib.
Daha əvvəl Fransa hakimiyyəti sarayda axtarış aparmağa cəhd etsə də, uğursuz olub. Milli Abidələr Mərkəzində, "Shotcut Events" şirkətinin ofislərində və bir neçə fiqurantın evlərində də axtarışlar aparılıb. Fransanın maliyyə antikorrupsiya briqadası "Shotcut Events" ilə bağlanmış müqavilələri təftiş edib.
