Maldiv adalarındakı sualtı mağarada tədqiqat apararkən həyatını itirən beş italiyalı dalğıcın hamısının meyiti sudan çıxarılıb.
Oxu.Az xəbər verir ki, bu barədə İtaliya Xarici İşlər Nazirliyinin nümayəndələri mətbuata açıqlamalarında bildiriblər.
Yerli hərbi dalğıclar fin mütəxəssislərin dəstəyi ilə həlak olanların cəsədlərini "Köpək balığı mağarası" adlandırılan və təxminən 60 metr dərinliyi olan ərazidə aşkarlayıblar. İlkin mərhələdə üç nəfərin meyiti çıxarılıb, axtarış işləri çərşənbə günü tamamlanıb.
Beş İtaliya vətəndaşının həlak olması barədə rəsmi məlumat ilk dəfə mayın 15-də yayılmışdı. Hadisənin dəqiq səbəbləri hələlik məlum deyil. Romadan olan müstəntiqlər və mütəxəssislər, mərhumların sualtı kameralarının qeydləri vasitəsilə qəzanın təfərrüatını araşdırırlar.
Sualtı qəzada həlak olan qrupda Genuya Universitetinin dəniz biologiyası üzrə professoru Monika Montefalkone, onun 22 yaşlı qızı, iki gənc tədqiqatçı və bir dalğıc təlimatçısı yer alırdı. Qayıqda əlavə olaraq daha 20 italiyalı sərnişin olub.
