Son vaxtlar maqnezium yuxusuzluq, narahatlıq və yorğunluğa qarşı ən populyar vasitəyə çevrilib. Bəs o, həqiqətən sehrli təsirə malikdir?
Rusiyalı nevroloq Olqa Butenko "Gazeta.ru"-ya açıqlamasında maqneziumun orqanizmə real təsirini şərh edib. O vurğulayıb ki, maqnezium vacib mikroelementdir: əzələ və sinir sistemini tənzimləyir, qan təzyiqini, şəkər səviyyəsini və ürək ritmini normada saxlayır, sümük sağlamlığı, DNT və zülal sintezində rol oynayır.
Lakin həkim xəbərdarlıq edir: cəmiyyətdə maqneziuma hər dərdə dərman kimi baxılır. Reallıqda isə o, yalnız orqanizmdə real çatışmazlıq olduqda faydalıdır. Qıcolma, əzələ ağrısı, zəiflik və halsızlıq kimi əlamətlər varsa, maqnezium qəbulu kömək edə bilər. Ancaq profilaktika məqsədilə kor-koranə içmək düzgün deyil.
Nevroloqun sözlərinə görə, maqneziumun ən effektiv tətbiqi miqren profilaktikasıdır. Bəzi xəstələrdə baş ağrısı tutmalarının sayını azaldır. Bundan başqa, maqnezium sümük toxumasını möhkəmləndirir, ancaq təkbaşına sümükləri bərpa etmir – bu, balanslı qidalanma və düzgün maddələr mübadiləsi tələb edir.
Həkim əlavə edib ki, maqnezium yalnız bahalı əlavələrdə deyil, həm də paxlalılar, yaşıl tərəvəzlər, qoz-fındıq, tam taxıllar və toxumlarda var. “Maqnezium zəruri və faydalıdır, amma möcüzə yaratmır. O, yuxu pozuntusu, xroniki yorğunluq və stress üçün yeganə çarə deyil”, – deyə o bildirib.
