Astronomlar Marsın təxminən 24 kilometr dərinliyində keçmişdə ərimiş maqmanın vulkanlara doğru hərəkət etdiyi geniş çat və kanal şəbəkələrinin izlərini aşkar ediblər. Bu kəşf alimlərin Marsın daxili quruluşu və tektonikası ilə bağlı təsəvvürlərini dəyişə bilər.
Oxu.Az xəbər verir ki, bu barədə Oksford Universitetinin mətbuat xidməti məlumat yayıb. Planetoloq Tobermori Makey-Çempion bildirib: "İndiyədək Marsda vulkanik aktivliyin sadə mexanizmlərlə baş verdiyi düşünülürdü. Yeni araşdırma göstərir ki, Marsın dərinliklərində mürəkkəb maqma dövranı olub."
Beynəlxalq qrup NASA-nın "InSight" missiyasının SEIS seysmometri məlumatlarını təhlil edərək Mars qabığının 24 km dərinliyində qeyri-adi seysmik anomaliyalar aşkar edib. Kompüter modeli bu anomaliyaların mineral tərkibi fərqli iki maqmatik süxur qatının sərhəddi olduğunu göstərib.
Alimlər hesab edir ki, bu anomaliyalar vaxtilə planetin nəhəng vulkanlarını qidalandıran "maqma çayları"nın izləridir. Bu, mürəkkəb geoloji quruluşun plitə tektonikası olmadan da formalaşa biləcəyini göstərir. Tədqiqat potensial yaşayış üçün əlverişli ekzoplanetlərin sayının gözləniləndən çox ola biləcəyini də ortaya qoyur.
