NATO ölkələri vətəndaşlarını hipotetik qlobal fəlakətə və ya müharibəyə hazırlayır.
Oxu.Az bu barədə NEWS.ru saytına istinadən xəbər verir.
Məlumata görə, NATO-ya üzv dövlətlər əhalini fövqəladə vəziyyətlərə hazırlamaq üçün aktiv kampaniyalara başlayıblar.
İsveç
2024-cü ilin sonunda İsveçdəki bütün təsərrüfatlara Mülki Fövqəladə Hallara Hazırlıq Agentliyi tərəfindən 32 səhifəlik broşür paylanıb. Vətəndaşlara evdə azı bir həftəlik su və ərzaq ehtiyatı saxlamaq tövsiyə olunur. Rəsmilər adambaşına gündəlik ən azı iki litr su, həmçinin uzunömürlü, yüksəkkalorili qidalar (qurudulmuş ət və ya balıq, mürəbbə, şokolad, quru süd) almağı məsləhət görürlər. Elektrik enerjisinin kəsilməsi ehtimalına qarşı evdə kibrit, alışqan, şam, günəş batareyası ilə işləyən radioqəbuledici, fənər və ehtiyat batareyalar saxlamaq tələb olunur.
Finlandiya
Finlandiyada təxminən beş milyon ailəyə 32 səhifəlik təlimat kitabçası paylanıb. Qanunvericiliyə əsasən, sahəsi 1 200 kvadratmetrdən çox olan binalarda sığınacaqların tikilməsi məcburidir. Şəxsi ehtiyat kimi üç günlük qida, su və dərman vasitələri, bunker üçün isə turist xalçası, yataq kisəsi, isti geyim və radiasiyadan qorunmaq üçün yod həbləri tövsiyə edilir.
Almaniya
Almaniya Əhalinin Müdafiəsi üzrə Federal İdarəsi son 35 ildə ilk dəfə hərbi ssenariləri ehtiva edən təlimat dərc edib. Sənədə əsasən, vətəndaşlar 10 gün ərzində avtonom şəkildə yaşaya bilməlidirlər. Bunun üçün evdə qida və su ehtiyatı, portativ qaz plitələri, ilk yardım dəsti, fənər, "powerbank" və ehtiyat geyim saxlamaq lazımdır.
Polşa
2025-ci ildə Polşa hökuməti "Təhlükəsizlik təlimatı" adlı genişmiqyaslı məlumatlandırma kampaniyasına başlayıb. Rəsmilər vətəndaşlardan yanğın, daşqın və ya hücum təhlükəsi zamanı evdən sürətlə çıxmaq üçün "həyəcan çantası" hazırlamağı xahiş edirlər. Ehtiyat siyahısına konservlər, bişirilmə tələb olunmayan quru qidalar, gigiyena vasitələri, ilk yardım dəsti, suyun dezinfeksiyası üçün həblər və radio daxildir.
NATO-nun təlimatlarına görə, hər bir vətəndaşın evində bel çantasında "həyəcan dəsti" olmalıdır. Buraya vacib sənədlərin kağız üzərindəki surətləri və skan olunmuş nüsxələri olan fləş-kart daxil edilməlidir.
