İran məhkəməsi, Nobel Sülh Mükafatı laureatı, Güney Azərbaycanlı hüquq müdafiəçisi Nərgiz Məhəmmədinin müalicə üçün cəzasının təxirə salınmasına icazə verməyib. Zəncan əyalətinin məhkəmə tibbi-ekspertizası onun səhhətinin ağır olduğunu və bir aylıq müalicəyə ehtiyac duyduğunu bildirsə də, məhkəmə orqanları bunu rədd edib.
“Azad İran” Telegram kanalının yaydığı məlumata görə, ailə üzvləri dünənki görüş zamanı Nərgizin səhhətinin ölüm-dirim mərhələsində olduğunu müşahidə ediblər. Daha əvvəl iki dəfə infarkt keçirən Məhəmmədinin hazırda vəziyyəti kritik olaraq qalır.
Xatırladaq ki, Nərgiz Məhəmmədi ötən il dekabrın 12-də Məşhəd şəhərində vəkil Xosrov Alikurdinin xatirə mərasimində bir qrup fəalla birlikdə həbs edilib. O vaxtdan bəri ailəsi onun səhhəti ilə bağlı dəfələrlə narahatlıq ifadə edib.
