Nigeriyada silahlıların məktəblərə hücumlarından sonra 80-dən çox uşaq itkin düşüb.
Oxu.Az-ın 'AP News' nəşrinə istinadən xəbərinə görə, son bir həftə ərzində eyni vaxtda ölkənin bir neçə bölgəsində məktəblərə hücumlar olub.
Qeyd edilib ki, Nigeriyanın şimal-şərqində silahlılar Borno ştatındakı ibtidai məktəbə hücum edib, Askira-Uba və Çibok rayonlarında 42 uşağı qaçırıblar. Sambisa meşəsinin yaxınlığındakı Mussa kəndinə də hücum olub.
'Hökumət bizi əmin edir ki, bu uşaqları xilas etmək üçün əlindən gələn hər şeyi edir, amma biz hələ də gözləyirik', - deyə Mussadadan olan dövlət məmuru Piter Vabba bildirib.
Ölkənin cənub-qərbindəki Oyo ştatında daha iki məktəbə hücum edilib. 'Amnesty International'ın məlumatına görə, orada ən azı 40 uşaq qaçırılıb, P.Vabba isə 48 uşağın itkin düşdüyünü açıqlayıb. Polis yerli sakinlər tərəfindən müəyyən edilmiş üç silahlı şəxsin həbs olunduğunu bildirib.
İnsan haqları fəalları xəbərdarlıq edirlər ki, qaçırılma təhlükəsi səbəbindən bir çox uşaq məktəbi tərk edir. Qeyd edilir ki, bəzən ailələr qızları hücumlardan qorumağa çalışaraq, onları məktəbdən çıxarıb evliliyə məcbur edirlər.
