Çikaqoda, İllinoys ştatında yerləşən Barak Obama Prezident Mərkəzi iyunun 19-da rəsmi olaraq açılır. Tikintisi 10 ildən çox çəkən və 850 milyon dollardan çox xərclənən mərkəzə keçmiş prezidentin özü rəhbərlik edəcək.
İlk ziyarətçiləri Barak və Mişel Obamanın heykəlləri qarşılayacaq. Mərkəz Cekson Parkında yerləşir və muzey, ictimai forum, kitabxana, gənclər zonası kimi məkanları özündə birləşdirir.
7.8 hektar ərazidə yerləşən kompleksin mərkəzində 69 metrlik qranit obelisk var. Bu, ABŞ-ın ilk qaradərili prezidentinə həsr olunmuş muzeydir.
Ziyarətçilər Obamanın həyatı ilə tanış ola, kafeteriyada isə 15.5 dollara "Obama Burgeri" dada bilərlər.
Mərkəz Obamanın prezidentlik dövrünün siyasətini əks etdirir: birinci mərtəbədə gənclik, ikincidə seçki qələbəsi, üçüncüdə prezidentlik nailiyyətləri nümayiş etdirilir.
