İran ilə ABŞ arasında müharibənin dayandırılması və yekun razılaşmanın əldə olunması üçün ikiaylıq danışıqların başlanmasına dair ötən həftə imzalanmış Anlaşma Memorandumu ətrafında İranda müzakirə və mübahisələr davam edir.
Oxu.Az-ın məlumatına görə, bu barədə "Azad İran" YouTube kanalının hazırladığı videosüjetdə bəhs edilir. Mübahisələr, o cümlədən ABŞ ilə danışıqlara etirazlar, memorandumun mətni mediaya sızdıqdan sonra başlamışdı.
İyunun 18-də İranın Ali Rəhbəri Müctəba Xameneinin xalqa müraciəti razılaşma ətrafında mübahisələri fərqli məcraya yönəltdi. Xamenei bildirdi ki, sənədlə bağlı fərqli mövqeyi olub, lakin Pezeşkian və Təhlükəsizlik Şurasının üzvləri öhdəlik götürdükləri üçün imzalanmasına icazə verib.
Bu, məsuliyyəti Pezeşkianın üzərinə qoymaqla yanaşı, onu radikal dairələrin hədəfinə çevirdi. Tanınmış məddah Məhəmmədəli Bəxşi minbərdən çıxışı zamanı Pezeşkianı terrorla hədələyib.
