Polşa hökuməti ölkənin 10 böyük şəhərində metro inşa etməyi planlaşdırır. Layihənin əsas məqsədi metrodan həm nəqliyyat vasitəsi, həm də mümkün hərbi əməliyyatlar zamanı sığınacaq kimi istifadə etməkdir.
RMF FM radiostansiyasının verdiyi xəbərə görə, Polşa İnfrastruktur Nazirliyi artıq "Metro Poland" layihəsini işə salıb. İşlər "Əhalinin müdafiəsi və mülki müdafiə haqqında" qanuna uyğun aparılacaq.
Hal-hazırda Polşada yalnız paytaxt Varşavada metro var. 2025-ci ilin dekabrında mer Rafal Tşaskovski metronu 100 min nəfərlik sığınacağa çevirəcək planı təqdim edib. Müharibə təhlükəsi zamanı stansiyalar çarpayı, yorğan və içməli su ilə təmin olunacaq.
