Misir-Fransa birgə arxeoloji missiyası Qahirədə Səlahəddin qalası yaxınlığında Məmlük dövrünə aid su təchizatı sistemi və məscid qalıqları aşkar edib.
Oxu.Az "Ahram Online" portalına istinadən bildirir ki, bu abidələr orta əsr qalasının sakinlərinin həyatı haqqında yeni məlumatlar verir.
Misirin Qədim Abidələr üzrə Ali Şurası (SCA) və Fransa Şərq Arxeologiyası İnstitutunun (IFAO) birgə layihəsi Ərəb əl-Yasar və əl-Həttaba rayonlarında qazıntılar aparıb.
Ərəb əl-Yasarda 10 metr diametrində və 8 metr dərinliyində iki daş quyu aşkar edilib. Bunlar su çarxları sistemi ilə qalanın zirvəsinə su qaldırırmış.
Dörd su çarxının qalıqları və geniş daş kanallar şəbəkəsi tapılıb. Bu, su kəmərinin hidravlik sisteminin son mərhələsinə dair ilk məlumatları ortaya qoyur.
Qazıntılarda heyvan izləri, tövlələr, yem saxlama sahələri, su hövzələri və daş döşənmiş səthlər də üzə çıxıb.
Əl-Həttabada Məmlük dövrünə aid məscid qalıqları, dəfn otağı və müxtəlif İslam dövrlərinə aid məzarlar tapılıb.
Artefaktlara keramika elementləri, Məmlük və Osmanlı sikkələri daxildir. Su kanalı qala ətrafındakı gündəlik həyatın yenidən qiymətləndirilməsinə kömək edə bilər.
