Qastroenteroloqlar qarında şişkinliyi aradan qaldırmağın təbii yollarını açıqlayıblar.
Nişa Patel və Acay Verma "The Guardian"a verdikləri müsahibədə dərman qəbul etmədən bağırsaq funksiyasını yaxşılaşdırmağın yollarını izah ediblər.
Mütəxəssislər qeyd edir ki, şişkinliyin əsas səbəbi maye qəbulu rejiminə riayət edilməməsidir. Acay Verma bildirib ki, bu səbəbdən qida bağırsaqlarda daha uzun qalır, qaz yaranır və ağırlıq hissi yaranır. Bunun qarşısını almaq üçün rasiona meyvə, tərəvəz, paxlalılar və tam taxıllar daxil edilməlidir.
Həkimlər daha çox hərəkət etməyi, xüsusən axşam yeməyində həddini aşmamağı məsləhət görür. Yüngül gəzinti belə həzmi sürətləndirir. Nişa Patel spirtli içkilər, yağlı və ultra emal olunmuş qidalardan uzaq durmağı tövsiyə edib.
Həkim əlavə edib ki, maye rejimi və stress bağırsaqlara ciddi təsir edir. Yaxşı yuxu və stressin azaldılması şişkinliyi aradan qaldırmağa kömək edir.
