Qərbi Avropanın bəzi ölkələrində may ayının sonuna doğru temperatur rekordları qeydə alına bilər.
Oxu.Az xəbər verir ki, bu barədə "Politico" nəşri yazıb.
Həftənin sonuna doğru İspaniya və Portuqaliyada ekstremal istilərin daha da güclənməsi gözlənilir. Portuqaliyanın bəzi bölgələrində havanın temperaturunun hətta 40 dərəcəyə çata biləcəyi proqnozlaşdırılır.
Fransa, Belçika və Böyük Britaniyada da meteoroloqlar yaxın günlərdə may ayının iqlim normasından xeyli yüksək temperatur gözləyirlər. Fransanın Milli Meteorologiya Xidməti isti hava dalğası ilə əlaqədar mayın 25-də Paris də daxil olmaqla, ölkənin 18 departamentində yüksək təhlükə səviyyəsi elan edib.
Britaniya meteoroloqları isə mayın 25-də ölkədə cari ilin may ayı üzrə ən yüksək temperatur göstəricisini qeydə alıblar. Belə ki, London və ətraf ərazilərdə havanın temperaturu 34 dərəcəyədək yüksəlib.
