Rusiyanın Baytarlıq və Fitosanitar Nəzarət üzrə Federal Xidməti (Rosselxoznadzor) Ermənistandan gətirilən "Cermuk" mineral sularında bikarbonat, xlorid və sulfatların normadan artıq olduğunu aşkarlayıb. Bu səbəbdən idxal müvəqqəti dayandırılıb.
Agentlik rəhbəri Sergey Dankvert "Rossiya 24" kanalında bildirib ki, məhsulların müalicəvi xüsusiyyətləri barədə yanlış məlumatlar səmərəsiz müalicəyə və sağlamlığın pisləşməsinə səbəb ola bilər. Məhsul etiketdəki məlumatlara uyğun gəlmir.
Rosselxoznadzor həmçinin Ermənistandan gələn meyvə-tərəvəz təchizatı ilə bağlı problemlər olduğunu bildirib. Rusiya müfəttişləri artıq istixanaları yoxlayır və yoxlama başa çatdıqdan sonra əlavə qərarlar qəbul ediləcək.
Xatırladaq ki, mayın 22-dən etibarən Rusiya Ermənistandan gül idxalını da müvəqqəti məhdudlaşdırıb. Bu tədbirlər yoxlamalar başa çatana qədər qüvvədə qalacaq. Statistikaya görə, Ermənistanın gül məhsullarının 90%-dən çoxu Rusiyaya ixrac olunur, keçən il ixracın həcmi təxminən 46 milyon dollar olub.
