Şimali Koreya süni intellekt (Sİ) texnologiyalarından istifadə edən yeni çoxtəyinatlı yüngül raketlərin buraxılış və taktiki qanadlı raketlərin zərbə atəşi sistemini sınaqdan keçirib.
Oxu.Az xəbər verir ki, bu barədə ölkənin Mərkəzi Teleqraf Agentliyi (KMTA) məlumat yayıb.
Yeni taktiki qanadlı raket yüksəkdəqiqlikli avtonom naviqasiya və topoqrafik uyğunlaşdırma sistemi ilə birləşdirilmiş Sİ əsaslı terminal yönləndirmə funksiyası ilə təchiz edilib.
Raket süzülmə və mühərrikli uçuşun kombinə edilmiş sxemindən istifadə edərək 100 kilometrə qədər məsafədə hədəflərə yüksəkdəqiqlikli zərbələr endirmə qabiliyyətinə malikdir.
Sınaqları ölkə lideri Kim Çen In izləyib. O, yeni silahların hərbi əhəmiyyətini yüksək qiymətləndirib və atəş idarəetmə sistemlərinin avtomatlaşdırılmasının müasir döyüş şəraitinə uyğunlaşdırıldığını bəyan edib.
KMTA-nın məlumatına görə, yeni silahların ölkənin cənubundakı artilleriya bölmələrinə verilməsi planlaşdırılır.
