Böyük Britaniyanın daxili işlər nazirinin müavini Cess Filips, hökumət başçısı Kir Starmerlə fikir ayrılığı səbəbindən istefa verib. O, mayın 12-də kabinetdən ayrılan ikinci rəsmi şəxsdir.
Bundan əvvəl Mənzil, İcmalar və Yerli Özünüidarəetmə naziri Miatta Fahnbulleh də etiraz əlaməti olaraq vəzifəsindən uzaqlaşıb.
Siyasi böhranın təməlində mayın 7-də keçirilən yerli seçkilər dayanır. Nəticələrə görə, Leyboristlər Partiyası Uels Parlamentinə nəzarəti itirib və ümumilikdə 1400 mandat azalıb. Starmer məğlubiyyətin məsuliyyətini üzərinə götürsə də, istefa etməyəcəyini bildirib.
Parlamentdə Starmerin getməsini istəyən leyborist deputatların sayı 80-ə çatıb. Onlar baş nazirin qalmasının 2029 seçkilərində partiyanı zəiflədəcəyini düşünürlər. Mayın 11-də bir neçə nazir köməkçisi də etiraz edərək istefa verib.
Lakin mayın 12-də keçirilən Nazirlər Kabinetinin iclasından sonra əmək və pensiyalar naziri Pat Makfadden bildirib ki, yüksək rütbəli üzvlər Starmerin istefasını tələb etməyib.
