ABŞ Zərbxanası 'American Innovation Coin' proqramı çərçivəsində Apple-ın həmtəsisçisi Stiv Cobsun xatirəsinə həsr olunmuş yeni bir dollarlıq sikkələri təqdim edib.
Sikkənin üzərində Cobsun gənclik illərindəki obrazı – boğazlı sviter, cins şalvar və idman ayaqqabısı ilə Şimali Kaliforniyanın təbiəti fonunda təsvir olunub. Layihə müəllifləri bu obrazın Cobsun dərin düşüncələrini və Kaliforniya təbiətinin onun texnoloji baxışlarına təsirini simvolizə etdiyini bildiriblər.
Dizayn Kaliforniya qubernatoru Qevin Nyusomun dəstəyi və 'Steve Jobs Archive' təşkilatının iştirakı ilə hazırlanıb. Təşkilat nümayəndələri Cobsun bölgənin təbiəti ilə sıx bağlı olduğunu və Apple cihazlarının minimalist dizaynında məhz bu mühitdən ilhamlandığını qeyd ediblər.
Qubernator Nyusom Stiv Cobsun Kaliforniyaya xas sahibkarlıq və innovasiya ruhunun təcəssümü olduğunu vurğulayıb.
Yeni sikkələr 25 ədədlik paketlərdə 61 dollara, 100 ədədlik dəstlərdə isə 154.5 dollara satılır.
