Rusiyada süni intellekt 27 il əvvəl törədilmiş qətl hadisəsinin üstünü açmağa kömək edib.
Moskva müstəntiqləri süni intellekt texnologiyasından istifadə edərək 1998-ci ildə baş vermiş bir cinayəti həll ediblər. Hadisə keçmiş rayon prokuroru Vitali Tixomirov və həyat yoldaşı Viktoriyanın qətli ilə bağlıdır.
Oxu.Az-ın məlumatına görə, bu barədə Rusiya İstintaq Komitəsinin müstəntiqi Alla Morozenko bildirib. Hadisə 1998-ci ilin dekabrında baş verib. Cütlüyün qızının polisə müraciətindən sonra mənzildə hər iki meyit tapılıb. Onların əl-ayaqları bağlanmış, bədənlərində çoxsaylı bıçaq yaraları aşkar edilib. Cinayətkarlar bahalı xəz palto və XIX əsrə aid ikona oğurlasalar da, cinayət uzun illər açılmamış qalıb.
2025-ci ildə müstəntiqlər hadisə yerində tapılan, lakin əvvəllər müəyyən edilə bilməyən barmaq izlərini süni intellektlə yenidən araşdırmaq qərarına gəliblər. Texnologiya izlərin papilyar naxışlarını bərpa edib və federal məlumat bazası ilə müqayisə edib. Nəticədə, Dubna şəhərindən 59 yaşlı Sergey Lapşin saxlanılıb. O, keçmiş zabit olub, sonradan cinayət aləminə qoşulub və əvvəllər məhkum olunub.
Lapşin etiraf edib ki, cinayəti Viktoriya Koçerginanın göstərişi ilə törədib. Qadın kriminal borclarını ödəmək üçün Tixomirovların qarətini planlaşdırıbmış.
