ABŞ yaxın vaxtlarda Suriyanı terrorizmin sponsoru olan dövlətlər siyahısından çıxarmaq qərarını təsdiq edə bilər. Bu addım ölkənin iqtisadi dirçəlişini asanlaşdırmaq məqsədi daşıyır.
ABŞ Dövlət Departamentindəki mənbələrə istinadən "Al-Monitor" portalı xəbər verir ki, terrora dəstək verən ölkə statusu ilə əlaqədar sanksiyalar Suriyanın beynəlxalq ticarətə tam qayıtması üçün son böyük əngəldir. Bu status xarici şirkətlərin Suriyaya investisiya yatırmasını və bəzi malların tədarükünü ciddi məhdudlaşdırır.
Qeyd edək ki, Suriyaya qarşı sanksiyaların böyük hissəsi prezident Əhməd əş-Şəraanın 2025-ci ilin mayında ABŞ lideri Donald Trampla görüşündən sonra ləğv edilmişdi.
Dövlət Departamenti altı ay ərzində Suriya dövləti ilə bağlı maliyyə axınlarının hərtərəfli yoxlanışını aparıb. Təftiş başa çatıb və qurum daxilində Suriyanın siyahıdan çıxarılması ilə bağlı yekdillik var. Son qərarı ABŞ dövlət katibi Marko Rubio verəcək.
"Başqa heç bir maneə yoxdur. Rubio öz imzasını atmalı olan sonuncu şəxsdir", - deyə portalın mənbəyi vurğulayıb.
