Suriyanın keçid hakimiyyəti keçmiş prezident Bəşər Əsəd dövründən qalan gizli kimyəvi silah proqramının qalıqlarını aşkarladığını açıqlayıb. Tapıntılar vətəndaş müharibəsi zamanı istifadə olunan xammal və sursatlara bənzəyir.
Oxu.Az "Reuters"-ə istinadən xəbər verir ki, bu barədə Suriyanın Kimyəvi Silahların Qadağan Edilməsi Təşkilatındakı daimi nümayəndəsi Məhəmməd Katub məlumat verib. O bildirib ki, hüquq-mühafizə orqanları Əsəd rejiminin kimyəvi proqramı ilə əlaqəli 18 nəfəri saxlayıb. Saxlanılanlar arasında yüksəkrütbəli hərbçilər, siyasi və texniki vəzifəlilər də var.
Katub qeyd edib ki, bu, əvvəlki hakimiyyətin gizlətdiyi proqramın qalıqlarıdır. Maddələrin və sursatların hansı ərazidə aşkarlandığı açıqlanmayıb.
"Reuters" xatırladır ki, Suriyada vətəndaş müharibəsi zamanı kimyəvi silahlardan dəfələrlə istifadə olunub. Qərb ölkələri və beynəlxalq təşkilatlar Əsəd rejimini zarin və xlor qazı ilə hücumlarda ittiham edirdi. Dəməşq isə bu ittihamları rədd edirdi.
