Türkiyənin Tokat bölgəsində son bir həftə ərzində fasilələrlə yağan şiddətli yağışlar Yeşilırmak çayında suyun səviyyəsinin artması ilə nəticələnib.
NTV telekanalının məlumatına görə, kənd təsərrüfatı və enerji istehsalı üçün istifadə edilən Almus su anbarında doluluq səviyyəsi həddini aşaraq daşmalara səbəb olub. Çox sayda əkin sahəsi su altında qalıb.
Turhalda təhsil müəssisələrində 3 günlük tətil elan edilib, 15 məhəllə və 7 kənd boşaldılıb. Sakinlər sığınacaq və mehmanxanalara yerləşdirilib. Yeşilırmak kənarında daşlardan sədlər qurulub.
Çay üzərindəki iki körpü suyun hərəkətinə maneə yaratdığı üçün sökülüb. Sahildəki evlərin qarşısına qum kisələri düzülüb, bir çox ticarət obyekti işini dayandırıb.
AFAD sədri Ali Hamza Pehlivan bildirib ki, Almus anbarı 100% doluluğa çatıb, Sivasdakı Kılıçkaya anbarı boşaldılır. Hazırda heç bir ölüm və ya xəsarət qeydə alınmayıb.
