ABŞ Prezidenti Donald Tramp Rusiya Prezidenti Vladimir Putinlə Alyaskanın Ankoric şəhərində keçən il keçirilən görüşdə əldə olunan bəzi razılaşmalardan imtina edə bilər.
Oxu.Az xəbər verir ki, bu barədə "Axios" portalı mənbələrə istinadən məlumat yayıb.
Bildirilib ki, Tramp bu fikrini Fransada keçirilən G7 sammitində xarici liderlərə çatdırıb.
Sammit iştirakçılarından ikisi qeyd edib ki, Tramp Putinlə bağlı məyusluğunu ifadə edib və Ankoric razılaşmalarından imtina edə biləcəyini bildirib.
Mənbənin sözlərinə görə, digər G7 liderləri Trampın bu istiqamətdə addım atacağına inanmırlar.
ABŞ dövlət katibi Marko Rubio əvvəllər bildirib ki, Ankoricdə Ukrayna ilə bağlı yekun razılaşma əldə olunmayıb.
2025-ci il avqustun 15-də Ankoric yaxınlığındakı hərbi bazada keçirilən görüşdə Putin Ukrayna münaqişəsinin həllini əsas mövzu adlandırıb. O, ABŞ ilə münasibətlərdə yeni səhifə açmağa çağırıb və Trampı Moskvaya dəvət edib. Tramp isə irəliləyiş olduğunu, lakin bütün məsələlərdə razılığa gəlinmədiyini bildirib.
