İran parlamentinin sədri Məhəmməd Baqir Qalibaf və xarici işlər naziri Abbas Əraqçı ABŞ-la müqavilə imzalamaq üçün Cenevrəyə səfər edəcək.
"The New York Times" iranlı rəsmilərə istinadən xəbər verir ki, iyunun 19-na planlaşdırılan imza mərasimində ABŞ tərəfini vitse-prezident Cey Di Vens təmsil edəcək.
Nəşr bildirir ki, bu görüş Vaşinqton və Tehran arasında son 47 ildə ən yüksəksəviyyəli görüş olacaq.
Cey Di Vens "Fox News"-ə müsahibəsində Prezident Donald Trampın da Cenevrəyə gedə biləcəyini istisna etməyib: "Biz logistika məsələlərini həll edirik. Mən mütləq orada olacağam, lakin prezidentin iştirakı ehtimalı var."
ABŞ, İran və vasitəçi Pakistan razılaşmanı təsdiqləyib. İran xarici işlər nazirinin müavini Kazım Qəribabadi deyib ki, 60 günlük atəşkəs müddətində sanksiyaların ləğvi, nüvə proqramı, iqtisadi bərpa və nəzarət mexanizmi müzakirə olunacaq.
Nazir müavini vurğulayıb ki, danışıqlar ABŞ-nin hərbi əməliyyatları dayandırması, Hörmüz boğazının mühasirəsinin götürülməsi və İran aktivlərinin dondurulmasının ləğvindən asılıdır.
