ABŞ Prezidenti Donald Trampın administrasiyasında İranla bağlı vahid mövqe yoxdur.
CNN mənbələrə istinadən xəbər verir ki, Ağ Ev daxilində fikir ayrılığı Trampın Çin səfərindən sonra daha da güclənib. Vaşinqton həmin səfərdən İran məsələsində irəliləyiş gözləyirdi.
İdari nümayəndələrin bir qismi, o cümlədən Pentaqon əməkdaşları İrana qarşı daha sərt yanaşmanı dəstəkləyir və hərbi zərbələri mümkün sayır. Digər rəsmilər isə ABŞ-nin İranla danışıqları davam etdirməsinin vacib olduğunu düşünürlər.
Mənbələrə görə, Tramp Hörmüz boğazının bağlı qalmasından narazıdır. Bu vəziyyət ABŞ-də neft və benzin qiymətlərinin artmasına səbəb olur.
"Prezident Tramp bütün variantları nəzərdən keçirir. Bununla belə, onun əsas üstünlük verdiyi yol diplomatiyadır", - deyə Ağ Evin mətbuat katibi Anna Kelli bildirib.
The New York Times isə yazır ki, ABŞ və İsrail İrana qarşı mümkün yeni zərbələrə hazırlığı gücləndirib. Trampın komandası münaqişənin gərginləşəcəyi təqdirdə atılacaq addımlar, o cümlədən İranın hərbi obyektlərinə və infrastrukturuna daha sərt zərbələr endirilməsi variantlarını hazırlayıb.
