ABŞ Prezidenti Donald Tramp İsrailin Baş naziri Benyamin Netanyahoya Livanda yalnız hədəfli hücumlar həyata keçirməyi məsləhət görüb. Bu barədə Ağ Ev rəhbəri "Axios" portalına müsahibəsində bildirib.
Tramp vurğulayıb ki, Netanyahu fəaliyyətini daha dəqiq hədəflərə yönəltməlidir: "Binaları məhv etmək olmaz. O buna yol verə bilməz. Belə hallar çox qorxuncdur və İsrailin imicinə zərər vurur."
ABŞ lideri Livanı və onun rəhbərliyini bəyəndiyini qeyd edib. O, həmçinin hesab edir ki, İranla bağlı əməliyyatlar başa çatdıqdan sonra Livan yenidən dirçələ bilər. "İran Livanı viran etdi. Onların oyuncağı olan 'Hizbullah' Livana ziyan vurdu. İran məğlub olduqda 'Hizbullah' da avtomatik olaraq məğlub olacaq", - deyə Tramp əlavə edib.
ABŞ administrasiyası İsraildən təmkinli olmağı və Livanla yeni diplomatik prosesə şərait yaratmağı xahiş edib. Bu çağırış regionda gərginliyin azaldılmasına yönəlib.
