ABŞ Prezidenti Donald Tramp süni intellekt (Sİ) şirkətlərinin səhmlərinin bir hissəsinin Amerika vətəndaşlarına verilməsini nəzərdə tutan təşəbbüsü dəstəkləyib.
Oxu.Az xəbər verir ki, bu barədə "Financial Times" məlumat yayıb.
Nəşrin yazdığına görə, əvvəllər əsasən sol siyasi dairələrdə səsləndirilən bu ideya senator Berni Sandersin Sİ laboratoriyalarına 50 faizlik vergi tətbiq olunmasını təklif etməsindən sonra daha geniş müzakirə olunmağa başlayıb.
Aprel ayında "OpenAI" rəsmi olaraq "İctimai Rifah Fondu"nun yaradılmasını təklif edib. Təşəbbüsə əsasən, süni intellekt şirkətləri səhmlərinin müəyyən hissəsini fonda köçürəcək, əldə olunan gəlir isə ABŞ vətəndaşları arasında bölüşdürüləcək.
Yeni modelə görə, səhmlər hökumətə deyil, birbaşa vətəndaşlara məxsus olacaq.
Bu sistem müəyyən mənada Alyaskada tətbiq olunan neft fondu modelinə bənzəyir. Ştat sakinləri 1982-ci ildən neft gəlirlərindən formalaşan fonddan hər il ödəniş alırlar.
Məlumata görə, ABŞ-nin maliyyə naziri Skott Bessent də təşəbbüsə maraq göstərib.
Bildirilib ki, ABŞ-nin süni intellekt sahəsində fəaliyyət göstərən aparıcı şirkətlərinin rəhbərləri gələn həftə Ağ Evdə bu məsələni müzakirə etmək üçün bir araya gələcəklər.
