ABŞ Prezidenti Donald Tramp Tayvanı rəsmi müstəqillik əldə etmək cəhdlərindən çəkinməyə çağırıb.
Oxu.Az xəbər verir ki, bu barədə o, "Fox News" telekanalına müsahibəsində danışıb. ABŞ lideri bildirib ki, Taypeyin bu məsələdə Vaşinqtonun dəstəyinə arxalanmasını istəmir.
"Biz müharibə axtarışında deyilik. Əgər hər şey olduğu kimi qalsa, düşünürəm ki, bu, Çini qane edəcək. Lakin biz istəmirik ki, kimsə 'Birləşmiş Ştatlar bizi dəstəklədiyi üçün gəlin müstəqillik elan edək' desin", - deyə Donald Tramp qeyd edib.
Bununla yanaşı, Ağ Ev rəhbəri Tayvana 14 milyard dollar dəyərində hərbi yardım paketini imzalayıb-imzalamayacağını təsdiqləməkdən imtina edib. Sənəd ötən il ABŞ qanunvericiləri tərəfindən ilkin olaraq təsdiqlənsə də, hələ də rəsmi şəkildə qüvvəyə minməyib.
"Reuters" agentliyinin məlumatına görə, Tayvan Xarici İşlər Nazirliyi Trampın ada ilə bağlı fikirlərini nəzərə aldıqlarını bildirib. Qurum vurğulayıb ki, ABŞ silahlarının satışı Vaşinqtonun təhlükəsizlik öhdəliyinin bir hissəsidir və bu məsələ Tayvanla münasibətlər haqqında qanunda birbaşa əks olunub.
Qeyd edək ki, Donald Trampın Çin sədri Si Cinpinlə danışıqlar apardığı Pekinə ikigünlük səfəri bu gün başa çatıb. ABŞ dövlət katibi Marko Rubio səfərdən sonra Vaşinqtonun Tayvanla bağlı mövqeyinin dəyişmədiyini bəyan edib.
