Prezident Donald Tramp Venesuelanın ABŞ-nin 51-ci ştatı ola biləcəyinə eyham vurub. O, bu niyyəti ehtiva edən şəkli sosial şəbəkəsində paylaşıb.
Şəkildə Venesuela ABŞ bayrağının rəngində göstərilib və üzərində "51-ci ştat" yazılıb. Yanvarda Tramp Kanada, Qrenlandiya və Venesuelanı ABŞ dövlətləri etmək istədiyini bildirmişdi.
"Fox News" əməkdaşı Coş Robertsə görə, Tramp Venesuelanı ilhaq planlarını ciddi şəkildə nəzərdən keçirir. Lakin Venesuela prezidentinin müvəqqəti icraçısı Delsi Rodriges belə bir planın mümkünsüz olduğunu deyib.
Xatırladaq ki, yanvarın 3-də ABŞ Venesuelada əməliyyat keçirib, prezident Nikolas Maduro və həyat yoldaşı Siliya Flores həbs edilərək Nyu-Yorka aparılıblar. Tramp onları narkoterrorizm və ABŞ-ni təhdid etməkdə ittiham edib.
