Azərbaycanlı politoloq İlqar Vəlizadə Qazaxıstanın Türküstan şəhərində keçirilən TDT-nin qeyri-rəsmi zirvə görüşü barədə "24kz" kanalına müsahibə verib.
Politoloq "Prime Time" verilişində zirvə görüşünün nəticələrini və əhəmiyyətini müzakirə edib. O bildirib ki, Aralıq dənizindən şərq sərhədlərinə qədər uzanan məkan əməkdaşlıq və sülh məkanıdır.
"Bu gün burada Avrasiyanın müxtəlif coğrafiyalarını birləşdirən mühüm logistika marşrutları formalaşır. Təkcə ölkələrimizin cəmiyyətləri deyil, həm də geniş beynəlxalq ictimaiyyət bu tədbirə diqqət yetirir. Bu sammitdə qəbul edilən qərarlar təsadüfi deyil. Rəqəmsallaşma və süni intellekt dövründə yaşayırıq. Sammitdə yüksək texnologiyalı həllərin, xüsusilə süni intellektin praktik tətbiqi xüsusi diqqət mərkəzində idi", - deyə politoloq qeyd edib.
Onun sözlərinə görə, sammitdən bir neçə gün əvvəl Qazaxıstan süni intellektin təhsilə tətbiqi ilə bağlı inqilabi qərar qəbul edib. "Bu, olduqca mühüm qərardır. Qazaxıstan süni intellekti praktikada, idarəetmədə və dövlət səviyyəsində bu qədər geniş tətbiq edən ilk ölkədir", - deyə vurğulayıb.
