Türkiyə Prezidenti Rəcəb Tayyib Ərdoğan və Pakistanın Baş naziri Məhəmməd Şahbaz Şərif Ermənistan lideri Nikol Paşinyanı seçki qələbəsi münasibətilə təbrik ediblər.
Oxu.Az xəbər verir ki, bu barədə Ermənistan baş nazirinin mətbuat xidməti məlumat yayıb.
Ərdoğan təbrikində deyib: "Xalqım və şəxsən öz adımdan sizi 7 iyun 2026-cı ildə keçirilən parlament seçkisində Vətəndaş Sazişi Partiyasının uğuru münasibətilə təbrik edirəm. Üçüncü dəfə hökumət qurmağınızda uğurlar arzulayıram. Regionda uzunmüddətli sülh və sabitlik üçün strateji vizyonunuzun uğurlu olacağına inanıram."
Pakistan Baş naziri də qələbəyə sevincini ifadə edərək bildirib: "Pakistan xalqı və hökuməti adından sizi ürəkdən təbrik edirəm. Pakistan Azərbaycanla Ermənistan arasında sülhə və əməkdaşlığa önəm verir. Yeni dövrün Cənubi Qafqazda sülhə, sabitliyə və iqtisadi inkişafa töhfə verəcəyinə ümid edirik."
